Un estudiu sollerta de qu'Asturies ye una zona de riesgu emerxente pa la babesiosis

Una infección similar a la malaria causada por un parásitu y tresmitida pola picadura d'un cachiparru

Un estudiu fechu por un equipu del Institutu de Salú Carlos III (ISCIII) alerta de qu'Asturies ye una zona de riesgu emerxente pa la babesiosis humana -una infección similar a la malaria causada por un parásitu y tresmitida pola picadura d'un cachiparru-, polo qu'encamienta a les autoridaes sanitaries a qu'aumenten la vixilancia énte'l riesgu que supón esta enfermedá pa la salú pública.

Según informó esti vienres ISCIII, esti estudiu epidemiolóxicu, que foi espublizáu na revista Parasites & Vectors, desvela un mayor riesgu en persones qu'enantes contraxeron la enfermedá de Lyme, tamién causada pola picadura d'esti artrópodu, lo que confirma la posibilidá de contraer dambes zoonosis de forma consecutiva o simultánea tres la esposición a los cachiparros n'árees xeográfiques onde les dos enfermedaes son endémiques.

Los autores principales del trabayu, Estrella Montero y Luis Miguel González , del Llaboratoriu de Referencia d'Investigación en Parasitoloxía del Centru Nacional de Microbioloxía del ISCIII, cuntaron cola collaboración de los médicos Víctor Asensi y Julio Collazos, y los equipos científicos de distintos hospitales d'Asturies, l'Hospital de Galdácano de Vizcaya y la Universidá d'Helsinki, en Finlandia.