Una app cola que Casu y Sobrescobiu busquen afitase como un destín intelixente

Unes gafes de realidá virtual ufierten una esperiencia per dellos llugares

'Redes VR' ye l’aplicación que tán entamando a desendolcar los ayuntamientos de Casu y Sobrescobiu p’afitase como un destín turísticu intelixente. Al traviés d’unes gafes de realidá virtual ufierten una esperiencia per dellos llugares del Parque Natural de Redes.

L’embalse de Rusecu, el llagu Ubales o Soto son dalgunos de los llugares que nos ufierta’l Parque Natural de Redes y que se puen esfrutar coles gafes de realidá virtual.

Enagora, les gafes tarán disponibles na Casa del Agua de Sobrescobiu y nel Centru d’Interpretación de Casu. Sicasí, al videu podrá entrase dende cualquier puntu al traviés d’un códigu QR.

Con esta idea, estos conceyos dan un pasu al frente pa convertise nun destín turísticu caltenible y intelixente.