Una investigación dexa controlar una enfermedá qu'amenaza a les poblaciones d'anfibios

L'estudiu ta lideráu pol Institutu Mistu d'Investigación en Biodiversidá, el CSIC y la Universidá d'Uviéu

Dende Mieres algámase controlar una enfermedá qu’amenaza a les poblaciones d’anfibios en tol mundu. Los investigadores algamaron, per primer vegada, tratar a los animales ensin necesidá de sacalos del agua. L’estudiu ta lideráu pol Institutu Mistu d’Investigación en Biodiversidá, el CSIC y la Universidá d’Uviéu.

La quitidriomicosis ye una enfermedá provocada por un mofu parásitu asiáticu qu’afecta a la piel de los anfibios, provocando un fallu cardiacu y la muerte a les poques hores de contraelu. Supón la estinción de poblaciones enteres, sobre manera les de monte. De fechu, n’Asturies, toles especies taríen infestaes, siendo’l sapu parteru común el más afectáu.

Un estudiu previu lideráu por Jaime Bosh en Mallorca, con poblaciones de sapu parteru balear, algamó eliminar el mofu sacando los exemplares del agua. Agora, esta nueva investigación col sapu parteru béticu n’Andalucía, dexa aplicar un funguicida agrario directamente nel entornu natural.

Tienen claro que l’usu de químicos na naturaleza nun ye deseable, pero la situación ye d’estrema gravedá pa dalgunos anfibios. Les traces del productu, amás, nun alteraron les propiedaes del agua.

Los dos investigadores califíquenlu como un primer pasu pa controlar la enfermedá y siguen trabayando p’algamar un métodu más específicu y d’alministración a gran escala. En previsión, hai qu’aplicalu a los exemplares d’Asturies.