Más de 8.000 persones faen hores estres non pagaes cada selmana n'Asturies

CCOO Mocedá pide que medre'l parque públicu de vivienda y que se regule'l preciu del arriendu

Más de 8.000 persones faen hores estres non pagaes cada selmana n'Asturies. En concreto 8.150 trabayadores y la cifra xube a 419.000 si abrimos el focu a toa España. Son les conclusiones d'un informe de Comisiones Obreres qu'analiza los cinco años de funcionamientu de la Llei de rexistru de xornada llaboral.

El sindicatu conclúi que les hores estres non pagaes siguen siendo un abusu avezáu. N'Asturies, esti trabayu estra, nin retribuyíu nin compensáu, tien un costu llaboral de 66 millones d'euros. Son 3.254 millones nel conxuntu del país.

Comisiones Obreres denuncia que ye un fraude pa los emplegaos, pero tamién pa la Seguridá Social y pa l'Axencia Tributaria. Esixen un control más efectivu que, pal sindicatu, pasa pela dixitalización de los rexistros.

Educación ta a la cabeza de los sectores que menos paguen les hores estraordinaries. Queden ensin compensación el 91%. Tres ella, finances y seguros.

Sicasí, los que más se salen de la so xornada llaboral ensin nada a cambiu trabayen nel sector del tresporte y almacenamientu con cuasi nueve hores más a la selmana. Y síguen-y hostelería, educación y les tecnoloxíes d'información y comunicaciones, toes percima de la media selmanal de 6,3 hores, según lo rexistrao pol INE.

N'España, semanalmente fáense 6,36 millones d'hores estres, de les que’l 41% nun se compensen. El volume total d'esti trabayu fuera de la xornada negociada equivaldría a crear 170.000 empleos a xornada completa según Comisiones Obreres.

CCOO Mocedá pide que s’aumente’l parque públicu de vivienda y que se regule'l preciu del arriendu

Mocedaes de Comisiones Obreres pide que s’aumente’l parque públicu de vivienda y que se regule'l preciu de los arriendos. El so responsable confederal alerta qu'Asturies ye la segunda comunidá onde más xubió'l preciu del arriendu nel últimu añu y pide midíes urxentes, na Escuela de Mocedá que'l sindicatu celebra n'Uviéu.

Un alcuentru nel que participó'l Director Xeneral de Vivienda, quien recordó que'l Principáu prevé construyir 600 viviendes públiques y sacar vivienda privada al mercáu del arriendu.

La ministra de Sanidá abre la puerta a negociar la baxa llaboral flexible

La ministra de Sanidá, Mónica García, abrió la puerta a negociar col departamentu d'Inclusión, Seguridá Social y Migraciones la propuesta de baxa llaboral flexible. Eso sí pide procuru y asegura que nun podría ser una ferramienta de coacción a los trabayadores pa qu'haya altes voluntaries.