Un terciu de persones d'ente 30 y 44 años viven d'alquiler

Cada vegada son más les persones incapaces d'acceder a una hipoteca

L’alquiler de vivienda cronifícase. Yá nun ye namás una opción pa la mocedá, sinón que cada vegada hai más xente que namás pue vivir d’alquiler. La edá media de los inquilinos medró: ún de cada tres tien ente 30 y 44 años. Y los más, 7 de cada 10 inquilinos, nun espera poder comprar un pisu.

Heredar yá tampoco significa dexar de vivir d’alquiler. Ocho de cada 10 herencies son compartíes y les viviendes que s’hereden, pol so allugamientu, nun suplen la necesidá residencial de los que les reciben.

Según un informe del Institutu d’Investigación Urbana de Barcelona, otru problema ye que los que quieren acceder a la vivienda tienen que competir con compradores con altu patrimoniu y con fondos d’inversión.

Too eso fai que les propiedaes tean cada vegada en menos manes y que’l mercáu del alquiler xenere una mayor fendidura social.

Cada vegada son más les persones incapaces d’acceder a una hipoteca

La vivienda sigue siendo una oportunidá de negociu. Según l’informe 'De Propietarios a Inquilinos' del Institutu IDRA, la demanda ta inflada porque xune a los que la quieren destinar pa vivir y a los que la quieren pa invertir señala Pablo Pérez, coautor del informe.

N’España’l 15% de les compraventes de vivienda del añu pasáu fueron feches por estranxeros non residentes. Suxeren llendar estes transacciones como pasa n’otros países de la Xunión Europea

L’estudiu afonda tamién na falta de vivienda social. Propón blindar contratos indefiníos de llarga duración y analizar la construcción del parque de pisos públicos.

Midíes pa evitar que s’afiten, al traviés de la propiedá, les desigualdades económiques de la sociedá.