Los mediadores alvierten de que los seguros van siguir xubiendo

Los seguros de coche xubieron en 2024 más d'un 30% y los del llar ente un 5 y un 10%

Los seguros de coche son los que más xubieron anguaño. En dellos casos, con primes a tou riesgu y dempués de dar un parte, hasta un 30% más caros. Dicen los mediadores de seguros qu'esta xuba rellaciónase más col aumentu de la siniestralidá, que cola inflación.

A más accidentes na carretera, más arreglos y daños personales que cubrir y seguros más caros. Ye la esplicación pa que les pólices de coche xubieren tanto anguaño. A terceros ente un 12 y un 14%.

Pero si amás dimos un parte y el seguru ye a tou riesgu, esa medría pue superar inclusive'l 30%, señala Reinerio Sarasúa, presidente del Colexu de Mediadores de Seguros d'Asturies.

Pero esti 2024 nengún seguru va llegar ensin xuba. El del llar tamién medra, ente un 5 y un 10%.

Los mediadores de seguros esplíquenlo pola falta de profesionales, que faen xubir el preciu del serviciu, lo que fai que cada vez se piense con más fuerza dexar de tener los servicios de los profesionales de los arreglos.

Los mediadores de seguros encamienten viaxar siempres con una póliza, polo menos, de 70.000 euros

Sobro otros seguros, los de viaxe, los mediadores encamienten que se contraten siempres con una cuantía mínima d'ente 60 o 70.000 euros, anque lo más recomendable ye que ronden los 200.000 euros.

Sobre manera, dicen, si se viaxa a países fuera de la Xunión o a EEXX onde la sanidá ye privada. Cada vez son más turistes los que los contraten.

Un mozu uvieín pide ayuda pa traer de Tailandia a la so novia tres sufrir un accidente de moto. Yá gastaron los 70.000 euros del seguru porque cada día d’UCI ellí cuesta 5.0000 euros.