Los espertos prevén que les esportaciones asturianes van vese afectaes pol trunfu de Trump

El presidente del Gobiernu y los líderes europeos feliciten a Trump

El trunfu de Donald Trump y la so intención de xubir los aranceles podría afectar a les esportaciones asturianes.

Asturies esportó'l pasáu añu a EEXX por valir de 241 millones d'euros. Ye l'octavu país nel nuesu ránking.

Supón el 4% de les nueses esportaciones, sobre manera zinc, aceru, combustible y pasta de madera. La intención de Donal Trump de poner aranceles a estos productos, nun creen los espertos qu'afecta a la industria rexonal.

Sí podría afectar la guerra comercial con China, sobre manera na fabricación de coches, esplica Miquel Serracanta, profesor d’EAE Business School.

La otra cara de la moneda ye que va haber más interés poles inversiones estranxeres, señala Jaime Malet, presidente de la Cámara de Comerciu d'EEXX n'España.

EEXX ye'l nuesu primer país importador. L'añu pasáu Asturies mercó por valir de 573 millones d'euros.

El presidente del Gobiernu y los líderes europeos feliciten a Trump

Les reacciones a la victoria del candidatu republicanu nun se fixeron esperar. El presidente del Gobiernu, Pedro Sánchez, propúnxo-y "trabayar nes relaciones billaterales" de los dos países. El líder de la oposición, Alberto Núñez Feijóo, tamién lu felicitó na rede X y dende VOX aseguren que ye la hora de los patriotes.

Otres felicitaciones llegaron de la Xunión Europea. La so presidenta Ursula Von der Leyen, pidió-y construyir una "axenda tresatlántica fuerte". Fuera de la Xunión, el primer ministru israelín, Benjamín Netanyahu, fala del mayor regresu de la hestoria y el presidente d'Ucraína, espera trabayar con él pa llograr la paz.