Comprar y conxelar de cara a Navidá

Comerciantes aseguren que pue aforrase un 50% en carne y pescáu

Comprar y conxelar de cara a Navidá p’aforrar hasta un 50% en productos como’l pescáu, ye la recomendación que llancen dalgunos comerciantes énte la medría de precios de pescáu, carne y fruta, a menos d’un mes de la cena de Nuechebona.

A 20 euros el kilo de media ta’l pixín negru nes pescaderíes asturianes a menos d’un mes de les cenes de Navidá. Xubió seis euros en dos selmanes y espérase que puea superar los 30€ na viéspora de Nuechebona, esplica Iván Guillen, pescaderu de 'CasaPesca'.

Situación asemeyada na carne col llechal superando yá los 100 euros el kilo. Dalgunes carniceríes asturianes decidieron vendelo namás baxo reserva pa esta Navidá, señala Fran García, carniceru d’Avilés.

La recomendación nos mercaos ye que s’adelanten yá les compres y que se conxele.

Lo que nun se pue conxelar son les uves. El so preciu, según Facua, medró yá un 24% y piensen que siguirá xubiendo de cara a fin d’añu. Nuna frutería avilesina, el kilo d’uva roza, de media, yá los 6 euros.