Asturies amenorgó'l paru en 2024 en 4.192 persones, un 7,31%

El Sepepa considera "mui positiva" la evolución del paru, qu'encadena 45 meses de baxada

El paru rexistráu nes oficines d'empléu amenorgó n'Asturies en 2024 en 4.192 persones, un 7,31%, el quintu mayor retayu ente les comunidaes autónomes, colo que la cifra de paraos asítiase en 53.180, según los datos asoleyaos esti vienres pol Ministeriu de Trabayu y Economía Social.

Amás, el Principáu ganó 7.009 afiliaos a la Seguridá Social, un 1,84%, la quinta meyora más moderada del país, hasta 387.082 trabayadores, acordies colos datos del Ministeriu d'Inclusión, Seguridá Social y Migraciones.

Nel conxuntu del país, el mercáu llaboral sumó 501.952 afiliaos en 2024, lo que supón un aumentu del 2,41 por cientu, y cerró l'añu percima de los 21,3 millones d'ocupaos, mientres que'l desempléu amenorga en 146.738 persones, un 5,42 por cientu, hasta los 2,56 millones, la menor cifra en 17 años, dende avientu de 2007.

El Sepepa considera "mui positiva" la evolución del paru, qu'encadena 45 meses de baxada

El Serviciu Públicu d'Empléu del Principáu (Sepepa) considera "mui positiva" la evolución del paru rexistráu en 2024, un añu nel que se consolidó un enclín de variaciones interañales positives pal “mercáu de trabayu" tres encadenase 45 meses consecutivos de descensos.

Sicasí, la directora del Sepepa, Begoña López, señaló que se sigue trabayando pa que más persones s’incorporen al mercáu de trabayu, col focu puestu nos perfiles profesionales que tienen mala cobertura y que, con esi oxetivu, va ponese en marcha tamién una nueva plataforma p'ayudar a les empreses asturianes a la busca de perfiles profesionales más específicos.