El preciu del cacáu xubió hasta un 50% xusto enantes de Navidá

Los confiteros asturianos nun repercutieron el costu nos sos productos

Costa de Marfil y Ghana producen cuasi'l 60% del cacáu que se consume en tol mundu. El mal clima recién provocó una mengua de la producción y encarecimientu del productu.

Nes confiteríes asturianes sí notaron esti aumentu, pero nun lu repercutieron nel preciu final, señala Paula Manjón, copropietaria de Confitería Xocolat.

Los espertos falen de qu'esta xuba va ser puntual y forma parte d'un ciclu. Los precios, a la llarga, van estabilizase al nun tratase de productos de primera necesidá, esplica Gustavo Iglesias, xerente de l'asesoría de comerciu internacional Sygex.

Los beneficiaos, según especialistes, son les grandes empreses que xestionen dende la producción hasta la venta y non tanto los pequeños productores de cacáu, señala Emilio Manjón, asesor de pequeños productores de cacáu en Guatemala.

El déficit ente ufierta y demanda’l pasáu exerciciu foi de 400 mil tonelaes y agora, en 2025, podría siguir creciendo.