El paru xube n'Asturies en 2.188 persones en xineru, un 4,11%, hasta 55.368

La mayor xubida en términos rellativos ente les comunidaes autónomes

El paru rexistráu nes oficines de trabayu xubió n’Asturies en xineru en 2.188 persones, un 4,11%, la mayor xubida en términos rellativos ente les comunidaes autónomes, hasta asitiar la cifra de desempleaos en 55.368, según los datos asoleyaos esti martes pol Ministeriu de Trabayu y Economía Social.

Col final de la campaña de Navidá, Asturies perdió en xineru 5.072 afiliaos a la Seguridá Social, un 1,31%, hasta 382.009 trabayadores, según los datos del Ministeriu d’Inxerimientu, Seguridá Social y Migraciones.

En términos interañales, ye dicir, al respective de xineru de 2024, el paru baxa nel Principáu d’Asturies en 3.848 persones, el 6,5%, mientres que la ocupación medra en 6.696 trabayadores, un 1,78%.

Nel total del país, el mercáu llaboral resintióse en xineru y perdió 242.148 afiliaos, la mayor mengua pa esti mes dende 2020, equivalente a un recorte del 1,13%, mientres que’l paru medró en 38.725 persones, un 1,51%, nun comportamientu avezáu nel arranque del añu dempués del final de la campaña navidiega.

El trabayu cayó sobre manera en xineru nel comerciu (48.363 afiliaos menos en tol país) y hostelería (47.630 menos) dexando’l total d’ocupaos en 21.095.814.

En cuantes al desempléu, el Ministeriu de Trabayu señala que la medría d’esti xineru caltién el total per baxo de los 2,6 millones, en 2.599.443 persones, el rexistru más baxu nesti mes nos últimos 17 años.