Alcoa allarga’l periodu del ERE nes sos dos plantes pa negociar con inversores

Maroto afirma que yá hai delles ufiertes de merca

La ministra d’Industria, Comerciu y Turismu, Reyes Maroto, dio anuncia güei de que la dirección d’Alcoa decidió allargar el periodu del ERE que vencía en pocos díes pa negociar col Gobiernu posibles inversores que puean mercar les plantes d’Avilés (Asturies) y A Coruña.

En declaraciones a la prensa nel Congresu, Maroto señaló que dempués de la xunta de la selmana pasada coles tres alministraciones públiques y cola dirección de la empresa, Alcoa llamó ayeri al Executivu pa dar anuncia de qu’allargarán el periodu del ERE, al empar que Maroto dixo que la mesa de negociación volverá a aconceyar la selmana viniente pa trabayar con esti nuevu horizonte.

Amás, Maroto afirmó que yá hai delles ufiertes de merca y que’l Gobiernu analizará con Alcoa la que garantice’l mayor númberu de trabayos y la caltenibilidá a mediu y llargu plazu de les dos plantes.

"Tenemos ufiertes de merca, tamos evaluándoles enagora y necesitábemos sentanos cola empresa pa ver con ellos qué ufierta ye la que daveres garantiza’l mayor númberu de trabayos nes dos plantes. Queremos la meyor inversión", dixo Maroto dempués de puntualizar qu’agora lo importante ye ganar tiempu cola prórroga del ERE.

Mientres, n’Avilés los trabayadores siguieron güei coles movilizaciones.