Alcoa diz tener alternatives pero esixe a los sindicatos negociar l’ERE

La empresa ta dispuesta a estudiar ufiertes poles dos factoríes

Alcoa ta dispuesta a estudiar ufiertes vidables poles plantes d’Avilés y A Coruña, anque enagora nun recibió nenguna.

Na xunta colos sindicatos celebrada güei en Madrid, la compañía treslladó a los trabayadores que buscarán alternatives al pieslle, pero esplicaránles cuando s’afite la comisión consultiva pal despidu colectivu.

Nuna declaración institucional, les alministraciones y los sindicatos acusen a la empresa de nun tener voluntá negociadora dempués de nun dir a la mesa de trabayu convocada pol Ministeriu d’Industria. Sicasí, la multinacional señala que la comunicación ye fluyida.

Pal llunes ta convocada una nueva xunta pa negociar el despidu colectivu, unos alcuentros a los que enagora namái van los sindicatos de la planta d’Avilés.