Alcoa nun tien conocencia de nengún comprador interesáu nes plantes

Avilés ratifica la so declaración institucional escontra'l zarru

Alcoa inda nun recibió nenguna ufierta de compra poles plantes d'Avilés y A Coruña, según confirmó la empresa a TPA Noticies, dempués de qu'ayeri la ministra d'Industria, Comerciu y Turismu, Reyes Maroto, asegurara que-y consten dellos inversores interesaos.

A la espera de que se concreten estos intereses, lo importante ye ganar tiempu enantes de que se lleven alantre los despidos.

El Ministeriu de Trabayu pidió que s'abriera un periodu de negociación ampliu p'asegurar que s'atopen soluciones positives, según una resolución na que Trabayu tamién pide a los trabayadores que constituya formalmente la comisión negociadora del ERE.

Yá van tres xuntes sobre l'ERE en Madrid a les que van los sindicatos d'Avilés y Alcoa, pero a la que nun se presentaron los d'A Coruña. Alcoa pide qu'apaezan na próxima como condición p'ampliar el procesu de consultes.

Dende Avilés acaten la mediación d'Industria, siempres qu'enantes haya un periodu ampliu pa buscar una alternativa al zarru.

La próxima xunta del ERE ente sindicatos y multinacional va ser el xueves que vien.

Avilés ratifica la so declaración institucional escontra'l zarru d'Alcoa

El plenu del Conceyu d'Avilés ratificóse güei, de manera unánime, na declaración institucional aprobada n'ochobre escontra'l zarru de Alcoa y en defensa del caltenimientu de l'actividá industrial y l'empléu.

Los conceyales estimaron la participación masiva de la ciudadanía na manifestación celebrada'l pasáu xueves n'Avilés.

La declaración institucional aprobada nun plenu estraordinariu'l pasáu 19 de payares y ratificada güei, en dambos casos por unanimidá, refuga'l zarru de la planta avilesina d'Alcoa y pide a la dirección de la empresa que rectifique la so decisión.