Alcoa opta por Parter Capital

La empresa diz que la ufierta de Quantum nun-y da garantíes financieres

Alcoa inclínase por vender les sos plantes d'Aviles y Coruña al fondu suizu Parter Capital. La decisión comunicábala esta tarde a los sindicatos, al Gobiernu central y a los gobiernos autonómicos d'Asturies y Galicia.

A entrugues del representante del Principáu, Alcoa desplicó que la otra ufierta, la de Quantum nun-y daba garantíes financieres.

Alcoa, sindicatos, Ministeriu d'Industria y los gobiernos d'Asturies y Galicia alcordaron esti xueves siguir mañana la xunta pa tratar la ufierta de Parter Capital nes plantes d'Avilés y A Coruña, la única que quedó sobre la mesa y qu'acepta la multinacional del aluminiu.

El secretariu xeneral d'Industria, Raúl Blanco, destacó'l so optimismu, mientres los representantes de los comités d'empresa de les dos plantes dixeron que van siguir reclamando les "máximes garantíes posibles" pa que'l procesu "salga alantre" anque yá namás cola ufierta de Parter, una vegada qu'Alcoa refugó la de Quantum.

Tres daqué más de trés hores de xunta, la única ufierta que permanez ye la del fondu suizu, l'únicu que primeramente cumplió coles principales condiciones alcordaes nel so día: garantizar el 100% de los empleos polo menos dos años y dar una solución integral a les dos factoríes afectaes.

Pela so parte, el grupu alemán Quantum Capital Partners comunicó la presentación de dos proyectos industriales, autónomos ente sí, pa les plantes de Alcoa n'A Coruña y Avilés que garanticen el 100% de los puestos de trabayu nes mesmes condiciones y por un mínimu de dos años.