Alcoa tresllada a los sindicatos que la de mañana ye la última oportunidá pa formar la mesa negociadora

La empresa ta dispuesta a ampliar el periodu de consulta

La dirección d’Alcoa dio güei un ultimátum al comité d’empresa de la fábrica d’A Coruña pa que se presente mañana nuna última xunta pa crear la comisión consultiva p’abordar l’espediente d’estinción de trabayu qu’hai sobre 686 trabayadores.

Según esplica’l presidente del comité d’empresa d’Alcoa Avilés, José Manuel Gómez de la Uz, na xunta de güei cola dirección de l’aluminera tampoco foi posible formar la mesa negociadora, por mor de la incomparecencia de los representantes de los trabayadores de la planta gallega, que nunca van a estos alcuentros.

A pesar de la disposición del comité asturianu pa formar la mesa, la dirección de la multinacional esplicó que ye imposible formalizar esi pasu pola falta d’una de los dos partes.

Sí ta dispuesta la empresa a ampliar el periodu de consultes, pero pa ello, alvierte, que ye preceptiva la constitución de la mesa negociadora del ERE, según Gómez de la Uz.

El presidente del comité d’empresa d’Alcoa d’Avilés pidió responsabilidá a los sos collacios de Galicia pa formar la mesa negociadora "porque, al final, lo contrario pue ser un problema grave pa nosotros".