Autónomos piden al Gobiernu que-yos garantice la prestación por cese d’actividá

Esperen que’l Conseyu de Ministros apruebe midíes más contundentes que les tomaes hasta agora

Los autónomos piden al Gobiernu que-yos garantice la prestación por cese d’actividá, una concesión qu’enagora nun ye automática. Les principales asociaciones de trabayadores por cuenta propia esperen que’l Conseyu de Ministros del martes viniente apruebe midíes más contundentes que les tomaes hasta agora.

Pedro Sánchez dio anuncia esti sábado de midíes pa los autónomos. Los trabayadores por cuenta propia consideren urxente qu’ente elles tea la reconocencia y concesión de la prestación por cese d’actividá de mou automáticu. La otra demanda ye que si nun hai ingresos, nun se pague la cuota a la seguridá social.

ATA, Auatae y UPTA, les tres organizaciones d’autónomos más representatives a nivel estatal xuntáronse pa falar d’estes propuestes, que yá ficieron llegar al Gobiernu. Confíen en que les tengan en cuenta porque, aseguren, son indispensables.

Ente los sectores más afectaos pola paralización temporal de l’actividá tán la hostelería y el pequeñu comerciu. Dende la Xunión de Comerciantes del Principáu piden aplazamientos nos pagos.

Ente les midíes previstes p’aprobar el martes, tamién tán la flexibilización de los axustes temporales de trabayu y el sofitu pa garantizar la liquidez de les empreses.