Danone plantega'l despidu colectivu y el zarru de la fábrica de Salas enantes de fin d'añu

La empresa xustifica l'ERE en causes granibles

La dirección de Danone treslladó esti martes a la representación de los trabayadores de la fábrica de Salas la so propuesta d'aplicar un ERE d'estinción pa los sos 69 trabayadores y el zarru de les instalaciones enantes de rematar l'añu pa treslladar la producción a Francia.

Según informaron fontes de CSI, qu'ostenta la mayoría nel comité d'empresa, la empresa xustifica l'ERE en causes granibles al alegar una infrautilización de les instalaciones, unos altos costos de producción y una cayida de les ventes de los productos que se fabriquen en Salas, como Danonino y los flanes de quesu y de vainilla.

Los planes de la empresa pasen por caltener la producción hasta dempués de branu y dempués empezar a treslladala adulces hasta'l zarru de la factoría, previstu p'antes de final d'añu.

Nesta mesma primer xunta desque Danone anunciara les sos intenciones el pasáu vienres, la dirección apurrió al comité un informe técnicu de cuasi dos mil folios que dambes partes van siguir analizando en nueves xuntes los próximos díes.

La representación sindical, que s'opón al zarru, yá ta estudiando l'entamu de movilizaciones, que previsiblemente van empezar el próximu xueves con una manifestación.