El Principáu asoleyará les places de la mayor estabilización d'interinos de la historia

El cambéu de la llei de función pública xube al 40% el pesu de los méritos nos procesos selectivos

El cambéu de la llei de función pública aprobada esta selmana na Xunta que xube al 40% el pesu de los méritos nos procesos selectivos supón el primer pasu pa la estabilización de los cerca de 7.000 interinos, que’l Principáu calcula afitarán los so puestos enantes del 31 d’avientu de 2024. Ye’l plazu qu'afita la norma estatal en cumplimientu cola esixencia de Bruxeles de menguar al 8% la tasa de temporalidá pa lliberar los fondos del Plan de Recuperación. L’oxetivu del Executivu autonómicu ye llegar al máximu posible.

Enantes del 1 de xunu viniente, el Principáu tendrá qu’asoleyar les places de la que sedrá la mayor estabilización d’interinos de la historia y enantes de qu’acabe l’añu tendrá que convocar tolos procesos. Habrá dos víes:
Los temporales que lleven más de cinco años nel puestu optarán a ser fixos mediante un concursu de méritos, ensin necesidá de pasar un exame. Función Pública calcula que, dexando al marxe sanidá y educación, nesta situación taríen 1.500 interinos.

Sí tendrán que facer un exame los trabayadores d’ente tres y cinco años d’antigüedá, unos 500, la vía pa ellos sedrá la del concursu oposición. Na fase de concursu lo que más pesará, un 90%, sedrá l’antigüedá nel puestu.

La tasa de temporalidá na Alministración autonómica ronda’l 15%, el 25 en Sanidá y Educación.​