El Principáu ve nel ERE de Vesuvius "una deslocalización en toa regla"

IX afirma que "nun tien xustificación económica y productiva pa esti pieslle"

El conseyeru de Trabayu y Industria, Enrique Fernández, señaló esti martes que la decisión de la compañía británica Vesuvius d'acabar cola actividá productiva nes sos plantes de Llangréu y Miranda de Ebro ye "una deslocalización en toa regla".

Na so respuesta a una entruga d'IX nel primer plenu ordinariu de la llexislatura na Xunta Xeneral, Fernández señaló que la decisión de Vesuvius foi "inesperada" por mor de que nun había "nengún niciu" de que la empresa tomare esa decisión.

Según el conseyeru, asina lo manifestare nos contactos de los meses enantes de la presentación del ERE en setiembre col Principáu y pilló tamién "despreveníos" a los trabayadores, que poco enantes firmaron un nuevu conveniu colectivu.

"Ye una empresa con beneficios y con altos índices de productividá, poro, ye una deslocalización en toa regla", apuntó dempués de considerar que "nun ye xusta" la rempuesta d'una empresa que contó dende'l so inxerimientu col capital humanu d'Asturies y con ayudes públiques p'afitase n'Asturies.

Amás, recordó que'l Principáu, na so calidá d'alministración llaboral, pidió a la empresa ampliar el periodu de consultes del ERE, plazu qu'acaba'l 14 de ochobre y que de caltenese ensin alcuerdu supondríen llevar alantre'l despidu de 111 trabayadores na planta de Llangréu y de 17 na de Miranda.