El parque fotovoltaicu de Zarréu tará operativu enantes de tres años

Ingesac Energy prepara l'estudiu d'impactu mediuambiental

La empresa valenciana Ingesac Energy prepara yá l’estudiu d’impactu mediuambiental del parque fotovoltaicu pa la mina de cielu abiertu de Zarréu, en Degaña, según fontes d’Industria. Según FAEN, esti equipamientu podría tar operativu nun máximu de tres años. En payares quieren entamar la restauración de la mina, que s’adaptará a los proyectos industriales previstos nel so tarrén.

La empresa valenciana Ingesac Energy pidió asesoramientu a la conseyería de Mediu Ambiente pa facer l’estudiu d’impactu mediuambiental del parque fotovoltaicu pa Zarréu.

Una instalación única n’Asturies cola que quier algamar una potencia instalada de 47 megavatios al traviés de 93.500 paneles solares, según la memoria del proyectu presentada n’Industria. Si sal too según lo previsto, la instalación podría tar operativa en dos o tres años, piensa FAEN.

Esti parque sedrá una escepción n’Asturies porque poles llendes nes hores de sol, nun ye’l llugar afayadizu pa esti equipamientu. Nesti casu, pesó la disponibilidá de suelu.

Más avanzáu ta’l proyectu de la central de bombéu reversible tamién pa Zarréu, anguaño en fase d’evaluación mediuambiental, y que yá tien los permisos de la Confederación Hidrográfica.

En payares quieren entamar los trabayos de restauración de la mina que dexarán adaptala a los proyectos industriales previstos.