Empresa y trabayadores de Vesuvius roblen un alcuerdu pa executar l'ERE

La compañía comprométese a negociar un plan de reindustrialización con futures recolocaciones

El comité d'empresa de les plantes de Vesuvius en Llangréu y Miranda de Ebro y la dirección de la compañía algamaron un alcuerdu pal cese de l'actividá industrial, que va suponer que los despidos previstos nel ERE van facese efectivos el 31 d'ochobre, anque col compromisu de buscar un plan de reindustrialización con futures recolocaciones.

Según anunció esti martes el secretariu xeneral de CCOO d'Industria d'Asturies, Damián Manzano, la dirección de la compañía comprometióse a negociar cola representación social un plan de reindustrialización que traiga la recolocación futura de los trabayadores escedentes n'otra actividá industrial que va tener que concretar so la supervisión de les alministraciones rexonal y central.

Manzano esplicó en rueda de prensa que la representación sindical consiguió arrancar el compromisu a la empresa de consiguir meyores condiciones nes indemnizaciones por despidu y prexubilaciones.

L'alcuerdu va ser robláu esta mesma tarde nel Serviciu Asturianu de Solución Estraxudicial de Conflictos (Sasec) dempués de qu'esti martes fuera ratificáu n'asamblea pol 99% de los trabayadores.

CCOO anunció que van siguir les movilizaciones y los tres compañeros zarraos na Catedral d'Uviéu van abandonar esta nueche la fuelga de fame, anque van siguir alantre col encierru porque "tán con fuerza".-