Entama la marcha del aluminiu

Ta prevista la so llegada a la Delegación del Gobiernu d’Uviéu a les 17:00

Los miembros del comité d’empresa d’Alcoa Avilés entamaron esti xueves lo que denomaron 'la marcha pol aluminiu', a pie hasta Madrid, cola qu’apuren los últimos esfuerzos de la llucha entamada va más d’ocho meses escontra’l pieslle de la fábrica y la perda de los sos trabayadores.

Na salida, a les 07:00 na puerta de les instalaciones fabriles, tuvieron arropaos por dellos miembros de CCOO, UXT y USO, los sindicatos convocantes, pa entamar un viaxe a pie que llegará a la capital d’España’l 24 de xunu viniente.

Llegarán a Madrid seis díes enantes de qu’acabe’l plazu de la multinacional de Los Estaos Xuníos pa buscar una alternativa al pieslle de les sos fábriques d’Avilés y A Coruña en forma d’un inversor interesáu na so esplotación.

A pesar de qu’haya dos inversores interesaos -el fondu alemán Quantum Capital Partners y el suizu Parter Capital-, los representantes de los trabayadores desconfíen, porque nun conocen a fondu los proyectos de merca presentaos.

El presidente del comité d’empresa, José Manuel Gómez de la Uz, dixo que l’ánimu "ye total" y ta convencíu de que van acabar la marcha porque la razón dará-yos fuerces.

Ta prevista la so llegada a la Delegación del Gobiernu d’Uviéu a les 17:00. Per delantre, 12 etapes.