Jaime Argüelles espera que los accionistes sofiten la entrada de los socios industriales mexicanos

El conseyeru delegáu de Duro Felguera defende la solvencia de les dos empreses

El conseyeru delegáu de Duro Felguera, Jaime Argüelles, espera que los accionistes de la compañía sofiten la entrada de los socios industriales mexicanos. Apurrirán 90 millones d’euros que dexen asegurar la viabilidá del negociu a llargu plazu. El pieslle de la operación, sicasí, durará dellos meses.

La llegada de socios industriales forma parte del plan de viabilidá de Duro Felguera y del alcuerdu pol que recibió’l rescate públicu. La operación entá va durar dellos meses a la espera de les autorizaciones afayadices. Ente elles, el preste de la Xunta Xeneral d’Accionistes.

L’ampliación de capital garantiza la entrada de 90 millones d’euros y supón que’l Grupo Prodi y Mota-Engil México pasarán a controlar ente un 31 y un 55% de Duro Felguera.

L’alcuerdu, que se lleva negociando un añu, dexará reforzar la tesorería p’acceder a nuevos contratos.

Argüelles cree que la entrada de les compañes mexicanes con mayoría nel accionariáu nun supondrá, a curtiu plazu, un cambéu na dirección de Duro Felguera. L’alcuerdu obliga a una participación mínima de cuatro años, anque la vocación de los grupos mexicanos ye caltenese nel tiempu.

El Grupo Prodi dedícase a proyectos d’infraestructura pública, pero tamién trabaya nel sector enerxéticu, el tresporte y el turismu. Participa al 49% nel otru sociu inversor, Mota-Engil México. L’otru 51% ye del grupu portugués del mesmu nome, Mota-Engil, que cotiza na bolsa de Lisboa y factura más de 3.000 millones d’euros añales.

Mota-Engil México encargóse de dalgunes de les infraestructures más relevantes del país, dende viaductos hasta centrales de ciclu combináu, y dende 2015 ye’l primer operador priváu nel mercáu eléctricu mayorista de México.