La crisis con Arxelia llega cola cifra de negocios con Asturies más baxa n'años

La Comisión Europea pide a Arxelia revertir la suspensión del tratáu con España

La Comisión Europea intervién nel conflictu diplomáticu ente España y Arxelia. Recuerda que la política comercial de la Xunión Europea ye la so competencia esclusiva y pide a Arxelia que dea marcha atrás na so decisión de suspender el so alcuerdu con España.

Lo que más esmolez d’esta crisis diplomática ye la importación de gas arxelín. Espertos económicos del país africanu aseguren que los contratos gasísticos tán protexíos.

N’España, la ministra pa la Transición Ecolóxica nun espera que surdan tensiones nel suministru, porque les rellaciones contractuales ente les compañíes privaes tienen una vixencia de 10 años.

Según Teresa Ribera, el suministru de gas ta funcionando con total normalidá.

Esmolición ente les empreses asturianes

Esmolición ente les empreses asturianes con intereses n’Arxelia que desconocen, de momentu, en qué midida pue afecta-yos la suspensión del Tratáu d’Amistá con España. Ellí tán desendolcándose dellos proyectos d’inxenería.

Les esportaciones dende Asturies al país norteafricanu supunxeron l’añu pasáu 65 millones d’euros, según el Ministeriu d’Industria, la cifra más baxa de los últimos años.

En 2010 disparóse l’interés de les empreses asturianes pol mercáu arxelín. Foi por mor d’una misión comercial apadrinada pol ex-presidente del Principáu Vicente Álvarez Areces, al qu’acompañaron representantes de 38 compañíes. Nun añu, Asturies pasó d’esportar 31 millones d’euros a esportar 103 millones.

Sicasí, les esportaciones a Arxelia menguaron nos últimos años, hasta la cifra mínima que s’algamó l’añu pasáu.

En cuantes a les tensiones diplomátiques, nun son nueves pa Duro Felguera, que tien n’Arxelia dos de les sos obres más importantes y non faltes de problemes nos últimos años. Agora reconduciérase la situación y ta trabayándose con normalidá.

Los más de los túneles d’Arxelia tienen instaláu un ventilador de Zitrón. La empresa tien pidíos y proyectos en cursu que si se paralicen, podríen causar un estrozu importante.

Otres inxenieríes asturianes con intereses na zona almiten sorpresa pola decisión del Gobiernu arxelín, pero no son ayenes al empeoramientu de les rellaciones con España.

Compañíes como ArcelorMittal tán esmolecíes pola posible medría del preciu del gas.