Les empreses españoles de fabricación de mazcarines yá noten un baxón nes ventes

La relaxación nel usu de la mazcarina y la llegada de los productos chinos tán notándose

Les empreses españoles de fabricación de mazcarines, como l’asturiana Fortia, yá noten un baxón nes ventes. De mano porque se relaxó l’usu, aseguren, pero, sobre manera, porque volvió’l productu chinu col que dicen, nun se pue competir en preciu, anque nun dean les mesmes garantíes.

La empresa asturiana Fortia surdió po mor de la pandemia pa dotar al mercáu español de mazcarines, cuando nun llegaben d’Asia, el gran proveedor. Llegó a cuntar con 50 trabayadores y a producir 30.000 unidaes al día.

Güei son 12 trabayadores y anque caltienen esa producción, nun saben per cuantu tiempu. La relaxación nel usu de la mazcarina y la llegada de los productos chinos tán notándose.

Poro, xuniéronse a l’Asociación Española de Fabricantes de Mazcarines.

Y pa que nun vuelva a pasar que la dependencia de material sanitario d’otros países, si llega’l casu, puea dexanos ensin suministros otra vegada, creen que les mazcarines tendríen que ser consideraes material estratéxico.