Los sindicatos planten a Alcoa nuna xunta pa negociar l’ERE

Argumenten que nun tienen comunicación oficial de l’apertura del ERE

Los miembros del comité d’empresa d’Alcoa d’A Coruña y Avilés plantaron güei a la dirección de la empresa na xunta convocada pa negociar l’espediente d’estinción de trabayu de dambes factoríes, que sumen 686 puestos de trabayu.

El presidente del comité d’empresa d’Avilés y máximu representante de CCOO nes plantes españoles del grupu, José Manuel Gómez de la Uz, esplicó que los representantes gallegos nin siquiera fueron a la xunta, mientres que los asturianos decidieron finalmente nun sentase na mesa al argumentar que nun tienen comunicación oficial de l’apertura del ERE.

Lo que sí tienen los sindicatos ye una comunicación oficial del comité européu d’empreses de que va entamar una demanda énte los tribunales holandeses escontra l’espediente por entender que la compañía incumple la normativa europea na so tramitación, apuntó De la Uz.

Los representantes de la empresa trataron ensin éxitu d’entamar un diálogu colos sindicatos, según Gómez de la Uz, qu’entiende que nun se daben les circunstancies afayadices pa ello.

Alcoa argumenta la so decisión nes pérdides derivaes de los problemes estructurales productivos y tecnolóxicos, la so menor capacidá de producción, una tecnoloxía menos eficiente, los altos costes fixos, xunto cola sobrecapacidá de producción de China, l’altu preciu de la materia prima y el costu de la enerxía.

Los sindicatos entienden que la única diferencia qu’hai ente les plantes d’Asturies y Galicia coles de los demás d’Europa ye lo que cinca a la tarifa eléctrica y proponen abrir un procesu de venta de dambes plantes pa evitar el pieslle nel casu de qu’Alcoa cese definitivamente la so xera en dambes plantes.