Los trabayadores contaxaos y aisllaos, de baxa por accidente llaboral

La mutua namás va pagar la baxa pero nun la va controlar

Los trabayadores contaxaos y aisllaos pol coronavirus van tar de baxa por accidente llaboral. La baxa contrólala directamente'l Serviciu de Salú al entender que l'aisllamientu o'l contaxu por COVID ye un asuntu de salú pública.

Va asimilase a un accidente de trabayu y vamos entamar a cobrala dende esi mesmu momentu y non dende'l día que lu tramitemos cola nuesa empresa. La mutua namás va pagar la baxa pero nun la va controlar, según esplicó nuna entrevista a TPA Noticies Matinal Carlos Rodríguez, presidente del Colexu de Xestores Alministrativos d'Asturies.

Carlos Rodríguez señaló que la carga de trabayu de los xestores alministrativos xubió ente un 400 y un 500%. Pese a ello, asegura que n'Asturies tanto los ERTE como les ayudes estatales fueron tramitaes en plazu. Almite dalgún retrasu nes ayudes del Principáu y acumuladura na tramitación d'ayudes de los conceyos.

El presidente de los Xestores Alministrativos d'Asturies cree que los autónomos, pymes y medianes empreses son los colectivos más afectaos pola pandemia, defende que les ayudes seyan directes y non al traviés del bancos y que los ERTE s'amplien más allá del 30 de setiembre.