Los trabayadores de la factoría d’Alcoa n’Avilés intensifiquen les protestes

El xueves acaba la prórroga del ERE

Los trabayadores d’Alcoa tán redoblando esfuerzos na so llucha pa evitar los pieslles de les factoríes d’Avilés y A Coruña.

Los trabayadores de la fábrica asturiana manifestáronse tola mañana na entrada del so centru de trabayu.

El xueves ye la fecha na qu’acaba la prórroga del ERE y poro, podríen entamar los despidos. Esi mesmu día celebraráse una xunta en Madrid ente toles partes implicaes pa tratar d’ampliar el procesu negociador hasta’l 15 de xineru.

Una estensión que nun ta confirmada porque la compañía pide concesiones por parte del comité d’empresa.

Los trabayadores insisten na viabilidá de la empresa y opónense al so pieslle, poro, consideren vital la intervención del Gobiernu pa frenar les pretensiones d’Alcoa.

Na xunta del xueves viniente volverá a pidise que la empresa retire l’espediente d’estinción de trabayu y que se trabaye en busca d’alternatives pa dar continuidá al funcionamientu de les factoríes implicaes.