Maroto confirma qu'hai compradores "vidables" interesaos n'Alcoa

Asegura qu'hai cuatro ministerios trabayando en llograr que la XE imponga araceles ambientales al aceru estracomunitario

La ministra d'Industria y Turismu, Reyes Maroto, confirmó esti martes qu'esisten ufiertes "vidables" pa les plantes d'Alcoa d'Avilés y A Coruña y que "llueu" va haber un estatutu especial pa les empreses electrointensives que les faiga más competitives nel mercáu internacional.

La ministra tuvo n'Avilés, onde caltuvo una xunta colos miembros del comité d'empresa d'Alcoa.

Con ellos punxo en valir la creación d'una mesa de siguimientu por mor del anunciu de zarru de les fábriques, que llogró ganar seis meses pa buscar un comprador.

L'estatutu pa les electrointensives foi un compromisu que nun se pudo cumplir a tiempu por cuenta de les alertes de la Comisión de la Competencia sobre dellos déficits que podríen traer que la Comisión Europea lo pudiera refugar.

"Siguimos trabayando nel estatutu, que va tar bien llueu, porque ye importante pa da-y solución a la crisis d'Alcoa", declaró la ministra, que conseñó que "va llegar a tiempu".

Maroto nun quixo avanzar información sobre los compradores interesaos porque eso ye daqué que se va tocar na próxima xunta de la mesa de siguimientu "pa que los trabayadores tengan l'enfotu de qu'esti Gobiernu trabaya pola industria y pa dar una solución a Alcoa".

Sí adelantó que yá se tán valorando les ufiertes, "y los inversores tán visitando les plantes", pero quixo ser prudente y esperar a la próxima xunta de la comisión de siguimientu d'esti procesu.

Mientres se preparen los trabayos pal estatutu de les electrointensives, conseñó que se convoca una nueva puya d'interrumpibilidá pa los próximos seis meses.

La ministra tamién caltuvo una xunta con representantes d'UXT y de esti sindicatu n'ArcelorMittal, pa la que tamién se comprometió a "estudiar dellos preseos, como poner na axenda l'impuestu medioambiental pa defender a la siderurxa europea", que dixo que ye daqué no que yá ta trabayando'l Gobiernu.

Reyes Maroto anunció que ta trabayando nun mapa de la España industrial que va dexar dotar a los polígonos empresariales de les meyores ferramientes, como fibra óptico, puntos llimpios o intermodalidá.

Amás, la ministra en funciones asegura qu'hai cuatro ministerios trabayando en llograr que la Xunión Europea imponga aranceles ambientales al aceru estracomunitario.