Mercasturies yá nun tien mercancía

El Principáu garantiza'l suministru de productos de primera necesidá

Mercasturies yá nun tien mercancía pa repartir. Lo postrero recibiólo'l llunes y dende entós nun volvieron entrar camiones nel principal centru loxísticu de fruta y verdura de la rexón.

Tamién falten dellos productos nes tiendes. Ye la consecuencia directa na ciudadanía de la fuelga de tresportes, que güei encara la so quinta xornada. Dellos supermercaos d'Asturies yá tienen estantes vacíos o con escasez de productos.

La falta nótase nes fruteríes. Tamién na zona de pexe y carne. Yá se ve escasez de productos lácteos y sigue notándose la falta d'aceite y fariña o pasta. Les cadenes de supermercaos más afectaes son les que tienen que traer el productu d'otres comunidaes.

Propietarios de dellos comercios pequeños d'alimentación aseguren que'l llunes podrá falase de desabastecimientu si nun se soluciona'l conflictu.

Chigres y restauranes empiecen a notar la falta de productu

Nos restauranes empieza a haber esmolición per falta de productu y más teniendo en cuenta que mañana, pol día del padre, hai munches reserves.

Nel restaurán Punto de Encuentro La Madreña tien qu'entamar la carta ensin daqué tan básico como pataques y ye que mañana reciben los dos últimos sacos qu'atoparon.

Nel restaurán Los Patios de Xixón la xuba de los precios de la carne supondríen un grave problema de nun antemanase a la situación.

El vicepresidente del Principáu, Juan Cofiño, treslladó esti vienres un mensaxe de tranquilidá énte la fuelga del tresporte de mercancíes per carretera afirmando que'l suministru tanto d'alimentos como d'otros productos de primera necesidá ta garantizáu.