Saint-Gobain anuncia un ERE na llinia de Sekurit

L'espediente afectaría a unes 100 persones, siendo'l 40% d'Avilés y el 60% de L'Arboç​

La dirección de Saint-Gobain Sekurit n'España punxo en conocencia de la Representación de los Trabayadores, la necesidá de restructurar la compañía y abordar un Espediente de Regulación d'Empléu en Sekurit España que dexe adaptase al nuevu tamañu y necesidaes del mercáu de vidriu p'automóviles.

Según informa la compañía, la dirección encamentó a los trabayadores a entamar el diálogu y negociación afayadices bien llueu, col envís d'abordar la situación, presentar y aldericar sobro'l plan d'actuación y negociar un plan social afayadizu.

La compañía asegura que necesita adaptar la so estructura al tamañu actual del mercáu del vidriu p'automóvil porque l'enclín indica que nun se recuperarán les cifres de venta pre-pandemia.

Los trabayadores informaron que, tres xuntase en Madrid, la compañía comunicó la intención de presentar dos midíes, que afectaríen a Sekurit a nivel estatal, ye dicir a les fábriques d'Avilés y L'Arboç.

Per una parte, un ERTE de 12 díes nel mes de xunu y per otra parte, un ERE, qu'afectaría a unes 100 persones en total, siendo'l 40% d'Avilés y el 60% de L'Arboç​.

La factoría de Saint Gobain d'Avilés, tien una plantiya de 125 trabayadores.

El Gobiernu asturianu llamentó güei que'l fabricante de vidriu p'automóviles Saint-Gobain vaya amenorgar plantiya na factoría d'Avilés, anque afitó que lo importante ye consiguir que l'impactu seya'l menor posible y qu'empresa y sindicatos tomen "decisiones afayadices" pa garantizar la producción n'Asturies munchos años.