TSK cierra 2020 con una cifra histórica de contratación

La inxeniería tien mui bones perspectives pa los próximos años, a pesar de les dificultaes aniciaes pola pandemia

TSK da por remontáu yá'l parón de la pandemia y recupera'l ritmu de contratación. 2020 cerró pa la inxeniería con un descensu del 35% en ventes. Algamaron los 586 millones d'euros, pero pese a la ralentización de les grandes infraestructures internacionales l'añu pasáu, les perspectives pa esti son mui favorables.

Asina que yá cerráu'l primer semestre del añu, TSK caltuvo la contratación en máximos y cuenta con una cartera pendiente d'executar de cuasi 2.000 millones d'euros. Nel periodu 2021-2023 va superar los 3.000 millones d'euros y un ebitda, un beneficiu llibre d'amortizaciones, de 300 millones d'euros, impulsaos pola so esperiencia y alta demanda d'anovable.

Les Principales infraestructures en cursu tán n'Arabia Saudita, Bolivia, Marruecos, Mozambique, Omán, Perú, República Dominicana, Costa de Marfil, Reinu Xuníu y España.

El 2020 sirvió pa consolidar el so lideralgu n'África. Ente obres, un cargador de barcos móvil, delles plantes solares y fotovoltaiques, centrales de ciclu combináu, plantes hidroeléctriques o un parque eólicu.

La esperiencia n'anovable y el boom d'esti sector en tol mundu rellanzó la cartera de pidíos de TSK. Amás de proyectos en tol mundu tamién la inxeniería presentó una manifestación d'interés de dellos proyectos de dixitalización de proyectos industriales en dellos llugares d'España con una inversión prevista de 800 millones d'euros.

En cuanto al empléu 2020 cerró llixeramente per debaxo de los 1.000 emplegaos, una cifra qu'espera superar de nuevo de la mano d'estos contratos. Los emplegaos repártense en cuatro centros tecnolóxicos en Madrid, Vitoria, Colonia n'Alemaña y Xixón especializáu n'enerxía, amás de tol personal espatriao.