Asturies recibe 8 millones pa meyora del patrimoniu históricu d'usu turísticu

Hereu afirma que les ayudes van valir pa fortalecer el turismu cultural y que van contribuyir a la diversificación, desestacionalización y calidá de la ufierta cultural d'España

Asturies va recibir 8 de los 207,6 millones d'euros d'ayudes que'l Ministeriu d'Industria y Turismu dio a 89 proyectos pa meyorar l’usu turísticu de bienes d'interés cultural (BIC).

De la cantidá dada a Asturies, 2,1 millones van destinar a la recuperación de la mina d’Arnáu, en Castrillón, tres millones a la rehabilitación del Palaciu de Balsera, n'Avilés y una cantidá asemeyada a la rehabilitación de los restos arqueolóxicos de La Campa Torres, en Xixón.

El Boletín Oficial del Estáu (BOE) espublizó esti vienres el resolvimientu de la llinia d'ayudes del Programa de Meyora de la Competitividá y de Dinamización del Patrimoniu Históricu con usu turísticu, convocáu nel Plan de Recuperación, Tresformamientu y Resiliencia.