Alcoa caltién l’ERE y los sindicatos dirán a la xusticia holandesa

Los representantes de los trabayadores entienden que la compañía incumple la normativa europea

Alcoa decidió caltener l’espediente d’estinción de trabayu pa les sos plantes d’Avilés y A Coruña, poro, los sindicatos con representación nel comité européu dirán a la xusticia holandesa, que nesti casu ye la competente, por entender que la compañía incumple la normativa europea.

Los miembros del comité européu analizaron güei la postura de la empresa nuna videoconferencia pa decidir los siguientes pasos a siguir por parte de la representación sindical en defensa de dambes factoríes, que sumen 686 trabayadores.

El secretariu xeneral de la Sección Intercentros de CCOO n’Alcoa, José Manuel Gómez de la Uz, esplicó que llevarán la denuncia lo primero posible porque los sindicatos nun van aceptar que siga alantre un espediente qu’incumple la normativa europea, porque’l procesu de consultes y d’información tendría que ser enantes de la toma d’una decisión.

Nun alcuentru celebráu’l xueves pasáu en Madrid, el comité européu empobinó a la dirección a retirar l’ERE dientro d’un plazu qu’acababa güei.

Según esplicaron fontes sindicales, la empresa espunxo los argumentos que la lleven a plantear el pieslle de les plantes d’Avilés y d’A Coruña, que pasen pol preciu de l’alúmina, la tecnoloxía de les fábriques o’l mercáu chinu.

Los sindicatos trataron de rebatir esos argumentos porque esisten otres fábriques n’Europa como les españoles, menos eficientes, con esos mesmos problemes y, sicasí, nun planteen pieslles.

Unos 200 trabayadores de la factoría qu’Alcoa tien n’Avilés percorrieron ayeri a pie, baxo la lluvia y temperatures ivernales, los 30 kilómetros que separten la instalación industrial d’Uviéu pa protestar escontra l’anunciáu pieslle de la planta y pidir soluciones.

Na xornada de güei, unes 150 persones participaron na marcha que salió de la planta d’Alcoa en Cervo (Lugo) y acabó na Praza da Mariña del ayuntamientu vecín de Burela, pa pidir midíes que seyan favoratibles pa la supervivencia de les fábriques que la multinacional tien en Galicia -A Coruña y Cervo- y Asturies.