Alcoa comunica a los sindicatos el zarru de les plantes d'Avilés y Coruña

El Principáu refuga'l zarru d'Alcoa y critica la so forma d'actuar

El grupu estadounidense Alcoa anunció güei'l zarru de les factoríes d'Avilés y Coruña, qu'empleguen a un total de 686 trabayadores, y xustificó esta decisión en que son les menos competitives del grupu, presenten problemes estructurales y rexistren perdes "significatives".

La multinacional, una de les mayores productores d'aluminiu del mundu, anunció l'entamu d'un procedimientu de despidu colectivu que va afectar a tolos emplegaos d'estes plantes (317 n'Avilés y 369 en Coruña) y comprometióse a trabayar p'amenorgar l'impactu d'esti procesu nel empléu y axustar un plan social colos sindicatos.

Según indicó Alcoa, los análisis fechos sobre la situación productible de les operaciones n'España concluyen que podríen consiguise meyores organizativas col cese de la producción n'Avilés y Coruña, calteniendo la producción nuna sola planta, la de San Ciprián, en Lugo, que produz tanto aluminiu como alúmina.

Alcoa sorrayó que los problemes estructurales productivos y tecnolóxicos, la so menor capacidá de producción, una tecnoloxía menos eficiente, los elevaos costos fixos, xunío a la sobrecapacidá de producción de China, l'eleváu preciu de les materies primes y el costu de la enerxía, xeneraron perdes "significatives" nestes plantes nos postreros dos años, que previsiblemente van siguir.

Amás, la compañía tamién avanzó que fixo "importantes esfuerzos" nos últimos años p'amenorgar los costos d'estes plantes y caltener l'empléu.

Sicasí, señala la empresa, por cuenta d'una tecnoloxía más antigua y menos eficiente, a la economía d'escala y a otros factores, estes plantes siguen ensin ser competitives.

Según los sos datos, la capacidá de producción d'aluminiu primario d'Avilés y Coruña ye de 93.000 y 87.000 tonelaes métriques añales, respectivamente.

Énte l'anunciu de zarru de dambes plantes, la ministra d'Industria, Comerciu y Turismu, Reyes Maroto, faló colos presidentes del Principáu d'Asturies, Javier Fernández, y de la Xunta, Alberto Núñez Feijóo, amás de colos alcaldes pa trabayar de forma conxunta nel caltenimientu de la capacidá industrial y l'empléu na zona, y anunció na so cuenta de Twitter que van caltener una xunta nos próximos díes.

Pa esti vienres ta previsto que Fernández y Feijóo s'axunten n'Uviéu p'analizar la decisión d'Alcoa y coordinar una respuesta coordinada.

Amás, la ministra pa la Transición Ecolóxica, Teresa Ribera, dixo que daqué "nun cuadra" nes esplicaciones del fabricante d'aluminiu Alcoa, y avanzó que la so decisión pue llevar a revisar y retrasar la próxima puya d'interrumpibilidá.

El Gobiernu amosó la so "sorpresa" y "esmolición", y reconoció que nos contactos calteníos nos postreros tres meses la multinacional norteamericana nunca informara que podía adoptar una decisión nesti sen, como la que finalmente treslladó al Ministeriu esta mañana de manera "unillateral".

Amás, pidió a Alcoa más información pa contribuyir a buscar una solución a esta situación y treslladó-y a la empresa qu'entame un procesu de negociación pa buscar alternatives coles mires de caltener la capacidá productiva de dambes plantes.

Los trabayadores, que defenden que dambes plantes puen ser vidables, yá anunciaron que van entamar movilizaciones énte una decisión que los asitia "énte'l cairón", y entamaron güei les protestes con bloqueos pa la salida de camiones de la planta de Coruña.

El presidente de la Xunta indicó que, tres el cambéu nel Executivu central, hai presupuestos pa les empreses electrointensives, Alcoa ente elles, qu'entá nun se repartieron, y reconoció que nun tienen fluidez col Ministeriu nin respuestes.

Pela so parte, dende'l Gobiernu asturianu refugaron la decisión d'Alcoa y criticaron "la insólita forma de proceder".

El PP d'Asturies atribuyó la decisión d'Alcoa de cerrar les sos plantes d'Avilés y Coruña a la "irresponsables política enerxética" del Gobiernu que, al so xuiciu, facilitó la xustificación d'esa midida, mientres que'l diputáu de Ciudadanos Armando Fernández esixó güei al Principáu y a la Federación Socialista asturiana "que salgan de la zona de confort" y esixan "con contundencia" la implicación del Executivu.

La Federación Socialista Asturiana (FSA-PSOE) espresó'l so refugu total y "dafechu" a la decisión y l'alcaldesa d'Avilés, Mariví Monteserín, declaró que va escosar tola so capacidá pa revertir les intenciones d'Alcoa.

UXT pidió la retirada del Espediente de Regulación d'Empléu (ERE) nes fábriques d'Alcoa y aseguró que nun hai causes granibles que xustifiquen el so zarru y IX Asturies esixó al Gobiernu autonómicu una posición esixente col Gobiernu de Pedro Sánchez pa que busque soluciones.

Mentanto, l'alcaldesa d'Avilés va axuntase con trabayadores y colos voceros municipales.

Mariví Monteserín taba mui molesta poles formes de la compañía p'anunciar el zarru y anunció que va facer tolo que ta na so mano pa revertir esta situación.

Tamién FADE llamentó la decisión d'Alcoa y considera difícil que puea ser reversible. El so presidente, Belarmino Feito, considéralo una consecuencia de la incertidume que pesa sobre'l sector enerxéticu y los precios de la lluz.