Amazon esplica'l so proyectu en Bobes a tolos grupos de la Xunta

Podemos pide tresparencia y el restu de los grupos que s'entaínen los trámites

Amazon prevé arrancar les obres de construcción de la so nueva plataforma loxística nel polígonu de Bobes, en Siero, el próximu mes de marzu y rematales en xunu de 2022, coles mires de qu'empiece a operar na seronda d'esi mesmu añu.

La puesta en marcha de les nueves instalaciones del xigante del comerciu electrónicu, que van cuntar con una superficie d'unos 200.000 metros cuadraos, podríen suponer la contratación inicial d'ente 800 y 1.000 persones.

Asina lo treslladaron esti xueves dos representantes de la empresa a los voceros de los grupos parlamentarios na Xunta Xeneral, n'alcuentros individuales nos que tamién participó'l vicepresidente del Gobiernu asturianu, Juan Cofiño.