ArcelorMittal para parte de la so producción pola fuelga del tresporte

La dirección de la compañía asegura qu'esti conflictu agrava un escenariu "yá de por sí mui complicáu"

La dirección d'ArcelorMittal espresó esti xueves la so “fonda esmolición” pol impactu que la fuelga de tresporte indefinida ta teniendo na actividá industrial y, particularmente, na siderúrxica, qu'obliga a parar la producción nes instalaciones acabadores (finishing) por falta de suministros.

La dirección de la compañía esplicó nun comunicáu qu'entiende los problemes qu'afecten al sector del tresporte, pero quixo treslladar qu'esti conflictu vien agravar un escenariu “yá de por sí mui complicáu”, por cuenta de los precios de la enerxía eléctrico y la incertidume económica derivada de la invasión de Rusia a Ucraína.

Una situación, siguió la dirección de la compañía, que pon, amás, en riesgu les necesaries inversiones que la empresa tien qu'abordar amestaes al so programa de descarbonización y que tán empobinaes a asegurar el futuru de la siderurxa n'Asturies.

L'anunciu de la siderúrxica coincide con una nueva xornada de paros convocada nes instalaciones asturianes polos sindicatos CCOO y CSI pa, ente otres coses, reivindicar una negociación sobre l'afectación del plan de descarbonización.