ArcelorMittal tresllada a los sindicatos la so situación de “emerxencia total”

CCOO reprochó a la empresa la falta d’información en materia económica

La dirección d’ArcelorMittal treslladó esti vienres a los sindicatos que ta en perdes, nuna situación de “emerxencia total”, en mou supervivencia y que ta intentando caltener la fábrica, poro, pidió a la parte social que faga un exerciciu de reflexón y collabore na toma de les midíes escepcionales que se necesiten.

Según CCOO, treslladó esta situación esti vienres a la dirección de la empresa dempués d’una xunta colos sindicatos na residencia de La Granda cola asistencia del conseyeru delegáu del clúster d’Asturies d’ArcelorMittal, Oswaldo Suárez.

Sobre la situación d’anguaño, según esti sindicatu, Suárez insistió nos problemes qu’arrastra la empresa dende ochobre del añu 2018 como les importaciones de terceros países, el costu enerxéticu, la baxada de los precios de venta, o la xuba del costu de la materia prima.

Considera qu’ArcelorMittal caltiénse pol so calter global, porque la situación n’Europa nun sedría caltenible nuna coyuntura que califica de “dramática” pol brexit y pol sobrecostu del CO2.

Per otra parte, la dirección de la siderúrxica dixo que se caltién la previsión d’arranque de la batería de coque de Xixón pa finales de 2019 o entamos de 2020.

La d’Avilés dexará de producir el martes viniente siguiendo los llabores de desmantelamientu hasta finales d’añu.

Caltiénse la previsión de paraes pal remocique de l’acería d’Avilés y unu de los fornos altos pa los primeros díes del mes de payares.

Dempués de la xunta, CCOO reprochó a la empresa la falta d’información en materia económica, que nuevamente, diz, se-yos negó a pesar de comprometese.