Asturies tien de retayar 29 millones del presupuestu al valtar el PP la sienda de déficit

Peláez:"Ye probable qu'haya que faer axustes presupuestarios, retayos concretos pola actitú del PP"

El conseyeru de Facienda, Guillermo Peláez, alvirtió güei que ye probable que'l Principáu tenga que retayar 29 millones d'euros de los presupuestos d'anguaño, que xuben a 6.348 millones d'euros, si finalmente nun pue dir al 0,1 por cientu de déficit que contemplen les cuentes autonómiques de 2023.

Ési yera la llende d'endeldamientu apautáu ente España y Bruxeles y conocíu dende setiembre polo que lu usaron na confección de les sos cuentes la mayor parte de les comunidaes autónomes, pero que quedó nel aire dempués de que'l miércoles el PP votara nel Senáu a la escontra de la sienda d'estabilidá prevista.

Según Peláez, el PP "na so estratexa de bloquéu al Estáu de la nación quitó a los asturianos de disponer de 29 millones d'euros", una cantidá que prácticamente daría pa cubrir los 31,5 millones d'euros presupuestaos pa la rede d'escueles de cero a tres años.