Webcams
Buscar
Nagua por llograr llueu un alcuerdu p'axustar la delda
Duro Felguera abrió la posibilidá de dar entrada a un nuevu inversor dientro del so capital social, al empar que confía en llograr puestos meyores na negociación del vencimientu de la so delda, de 205 millones d'euros.
El presidente de Duro Felguera (DF), Ángel del Valle, espunxo nun alcuentru colos medios al términu de la Xunta Xeneral d'Accionistes, celebrada n'Uviéu, qu'autorizó al Conseyu d'Alministración a executar, nel plazu de cinco años, una ampliación d'hasta la metá del so capital social.
Del Valle conseñó que, de dar entrada a un nuevu sociu, l'inversor tendría qu'apurrir a la multinacional asturiana "solvencia, negociu y sostenibilidá".
Na so intervención énte los accionistes, Del Valle recordó que la compañía ta negociando cola banca pa "acompasar" les necesidaes de lliquidez y el vencimientu de la delda al plan de negociu.
Del Valle reconoció que, nesti "llargu tiempu" que ta durando la negociación, la sociedá ta "sufriendo un fuerte 'impasse' na so actividá comercial, de contratación y, poro, provocando un fuerte impactu na so ayalguería".
El presidente de la multinacional amestó qu'esta negociación afectó "a la situación financiera de la compañía y de manera importante a la consecución de contratos nestos últimos meses", ya que "los veceros exixen a los sos posibles contratistes avales que garanticen los sos compromisos y que-yos dean esi enfotu".
Sicasí, avanzó que la empresa axustó un alcuerdu d'espera" o "standstill" qu'espera formalizar "nel menor tiempu posible".
Esti alcuerdu d'espera, que tendría una duración averada a tres meses, torgaría a cualquier compañía la reclamación de dalgún tipu de pagu nesi periodu de tiempu, según puntualizó.
Del Valle almitió que 2016 foi un añu "malu", nel que la empresa perdió 18,2 millones d'euros, un 73,6 por cientu menos qu'en 2015, pero aseguró que les perspectives pal añu que vien son "mui bones", yá que espera poder facer desapaecer les incertidumes qu'afectaron a la compañía.
Según dixo, Duro Felguera lleva dos años acostinando "les consecuencies de dellos acontecimientos" -que llegó a calificar de "trona perfecta"-, dalgunos "por dificultaes na xestión de dalgún proyectu", pero que "na so mayoría fueron por causes imprevisibles y d'imposible control".
Too ello, tuvo un "fuerte impactu" na ayalguería y "na marcha normal de la sociedá", amestó'l presidente de DF, que recordó que la multinacional ta somorguiada en dellos procesos de reclamación y arbitraxe en diversos proyectos n'Australia, Arxentina o la India, que sumaos a los saldos pendientes de Venezuela, dexen un total de cobros y reclamaciones ensin resolver de 492 millones d'euros.
Del Valle resaltó que la empresa ta executando delles midíes empobinaes a la meyora de la lliquidez, por aciu la desinversión n'activos inmobiliarios y otros que "nun constituyan el nuedu central de l'actividá", asina como al "aforru en gastos d'estructura que nun impacten de forma significativa" nel negociu.
Del Valle tamién punxo en valir énte los accionistes la recién incorporación de Miguel Zorita como asesor del conseyu d'alministración pa encarar el procesu de reestructuración en que ta somorguiada, conociendo la so esperiencia como presidente de Deloitte n'España, conseyeru de la constructora San José o conseyeru de Telefónica.
Amás, destacó que, pese a les dificultaes, Duro Felguera siguió avanzando na so estratexa d'internacionalización consolidando la so presencia nel norte d'África o en Llatinoamérica, y abriendo nuevos mercaos con contratos n'Europa del este, Canadá y rexones d'Oriente Mediu.
Del Valle destacó qu'anguaño se roblaron contratos por valir de 400 millones d'euros, aproximadamente, toos ellos "baxo condiciones de mínimos", y aseguró que podríen algamase más de nun ser polos problemes qu'encaren anguaño.
Per otra parte, esplicó que nun ven la eliminación de puestos de trabayu na rexón, y que, anguaño, tolos trabayadores de DF n'Asturies cobraron toles mensualidaes.
