Danone aconceyará mañana colos trabayadores

Los trabayadores aseguren que la marcha de la empresa pue suponer un desastre pa Salas

Danone cumplió 41 años en Salas. La so llegada foi una revolución pa los vecinos del conceyu y la so contornada que víen la oportunidá d’alcontrar trabayu en casa.

Tres trabayadores de la multinacional, un día enantes de la xunta que se celebrará mañana n’Uviéu ente’l Comité d’Empresa y la dirección de la compañía pa conocer les intenciones de la mesma, aseguren que la marcha de la empresa pue suponer un desastre.

Ismael Peláez entró en Danone Salas en 1982, l’añu d’abrir la planta y xubilóse va siete meses, dempués de 40 años na empresa. Vicente López cumple 37 años trabayando nel llaboratoriu de Danone Salas, y entá s’alcuerda del día que lu llamaron pa entrar y Daniel del Oso llegó a Danone’l 1 de xunu de 2003, recién cumplíos los 26.

Sentaos delantre de la planta falando, güei 9 de mayu con sol de xusticia en Salas, lo único que piden ye qu’esto nun termine como la película de León de Aranoa, con un 'llunes al sol'​.