Danone plantega' l pieslle de la so fábrica de Salas

El Principáu pide que Danone camude la so decisión de zarrar la planta de Salas

La dirección de Danone treslladó esti vienres a la representación sindical una propuesta de cese d’actividá de la fábrica que tien en Salas, que cunta con 79 trabayadores directos y otros indirectos venceyaos, por exemplu, cola seguridá y el tresporte.

Según informó esti vienres Danone nun comunicáu, la empresa y la representación de los trabayadores abrirán un procesu de diálogu "pa ufiertar les meyores soluciones posibles" y tratar de llegar "a un alcuerdu amañosu pa los intereses de toles partes".

La fábrica de Salas, qu’abrió en 1981, dedícase, sobre manera, a la fabricación de quesu fresco, flan de quesu y postres en caliente.

La compañía eplicó qu’esta decisión inxértase dientro d’un procesu de racionalización, énte la necesidá d’adaptase "a les tendencies actuales y futures del consumidor y garantizar, al empar, la eficiencia de les operaciones industriales col envís de siguir construyendo’l futuru de les marques y afitar la so competitividá".

El Principáu pide que Danone camude la so decisión de zarrar la planta de Salas

El Gobiernu d’Asturies manifestó la so "sorpresa" énte l’anuncia de la multinacional Danone de zarrar la factoría de Salas, pueblu onde lleva afitada 41 años y que da trabayu a 80 persones, y reclamaron a la compañía que "camude la so decisión".

Nun comunicáu, l’Executivu asturianu, que tuvo conocencia de la noticia al empar que los representantes de los trabayadores, amosaron el so "ablucamientu énte una desinversión qu’afecta a una compañía del sector de la lleche, que salió favorecíu pola pandemia sanitaria".