El Gobiernu d'España caltién contactos cola dirección d'ArcelorMittal al más altu nivel

Raül Blanco apuesta poles investigaciones del centru d'I+D d'Arcelor n'Asturies y asegura que puen traer proyectos importantes

L'estatutu electrointensivu y les sos midíes p'abaratar la lluz industrial, que pasen por tener presupuestos, van ser la prioridá del actual executivu si repite tres la elecciones, según señaló'l secretariu xeneral d'Industria, Raül Blanco, nuna entrevista a TPA Noticies.

Coles compensaciones al CO2 a nada d'aprobase, el Ministeriu d'Industria apunta a más opciones pa dar futuru a Arcelor. "Hai qu'ampliar el focu a la importancia real que tien ArcelorMittal y a tolos proyectos que ta desplegando n'Asturies. Non solo nel ámbitu puramente de producción d'aceru, sinón por casu, nel centru tecnolóxicu, que yá cunta con 300 inxenieros y ye un puntal d'Industria 4.0 con proyectos de futuru mui importantes", señaló Blanco.

El secretariu xeneral d'Industria asegura que'l Gobiernu d'España caltién una relación constante cola alta dirección d'ArcelorMittal. Unos alcuentros que Raül Blanco califica de positivos. "Ye una relación continua, directa, mui fluyida y positiva", asegura.

Sobro la próxima puya d'nterrumpibilidá, Industria nun espera grandes cambeos y apunta a un repartu de compensaciones de nuevo a la baxa.

Respecto al futuru de los trabayadores de Vesuvius, Blanco asegura que pasa pola voluntá de la multinacional de dar tiempu y tar abierta a soluciones, anque tamién señaló que dende Industria, nun van renunciar a buscar soluciones pal empléu.