El Muséu Arqueolóxicu d'Asturies ufierta esti branu visites guiaes y de baldre

Amósase'l claustru qu'ocupa'l muséu, los sepulcros o les llábanes funeraries

El Muséu Arqueolóxicu propón visites guiaes pa dinamizar les actividaes del branu.

Entamamos pel claustru, onde hai restos de la captación d’agua del monesteriu de San Vicente qu’ocupaba esti llugar. Equí ta’l sepulcru de la familia Bernaldo de Quirós apunta Charo Suárez, guía del Muséu Arqueolóxicu. Al llau otru asemeyáu, pero d’un fíu bastardu.

La visita, d’una hora de duración, sigue nesti casu pela dómina romana.

Una maqueta del campamentu militar romanu de Monte Curriechos, en L.lena, asítianos nel contestu históricu.

N’otra sala alcontramos una réplica de la llábana funeraria que marcaría’l llugar onde taba enterráu esi soldáu ástur. Tiempu tamién pa conocer que daqué tan popular como’l morteru tenía un orixe romanu.

Una visita que resultó provechosa señalen Sergio Suárez, visitante d’Uviéu y Hugo Díaz, visitante de Xixón. Tolos díes d’apertura del muséu hai tres visites guiaes de baldre.