El Principáu espera una "ufierta meyorada" de Quantum sobre Alcoa

Pola apuesta pol caltenimientu de l’actividá y del trabayu

El Gobiernu asturianu espera que’l fondu d’inversión Quantum Capital Partners faga nes hores vinientes una "ufierta meyorada" pa la compra de la empresa Alcoa, según informó’l conseyeru de Trabayu, Industria y Turismu, Isaac Pola.

En declaraciones a los periodistes enantes de participar na inauguración del VI Foru del Metal, Pola defende que s’analicen toles ufiertes qu’hai enriba la mesa ensin esclusiones pa poder "escoyer la meyor".

El conseyeru consideró que’l caltenimientu de l’actividá y del trabayu son los factores fundamentales a la hora d’optar por dalguna de les propuestes de compra de la compañía aluminera.

Fontes d’Alcoa señalaron que’l fabricante de los Estaos Xuníos d’aluminiu sigue enfocáu "dafechu" na ufierta que presentó Parter Capital poles sos fábriques d’Avilés y A Coruña.

Según Alcoa, esta ufierta ye la que da "oportunidaes de futuru" pa les dos plantes, incluyida la posibilidá de recuperar l’actividá de la producción d’aluminiu primario, y garantiza caltener polo menos dos años los trabayos y les condiciones llaborales pa los trabayadores.

El Ministeriu d’Industria convocó a una xunta a Parter Capital y a los gobiernos d’Asturies y Galicia pa güei col envís de conocer el proyectu industrial que’l fondu suizu tien pa estes dos factoríes.