El Principáu llama a la negociación pa desactivar la fuelga en supermercaos

La Conseyería d'Industria, Trabayu y Promoción Económica trabaya pa evitar cuatro nuevos paros

La Conseyería d'Industria, Trabayu y Promoción Económica, al traviés de la Dirección Xeneral de Trabayu y Formación, fai un nuevu llamamientu al diálogu ente la representación empresarial y los representantes de los trabayadores, siendo consciente de que la negociación ye la única vía pa desactivar el conflictu.

Nun comunicáu, el Gobiernu d'Asturies afirma que sigue trabayando pa evitar, dende les 22:00 de mañana, cuatro nueves xornaes de paru nos supermercaos del Principáu.

El director xeneral de Trabayu y Formación, Pedro Fernández-Raigoso, señala que dende la selmana pasada, enantes inclusive del entamu de les primeres xornaes de fuelga, el so departamentu y el Serviciu Asturianu de Solución Estraxudicial de Conflictos (Sasec) tán a disposición de dambes partes les 24 hores y diz que "se trabaya constantemente fomentando'l diálogu como única vía posible p'algamar una solución positiva del conflictu".

La fuelga convocada nel sector minorista d'alimentación caltiénse ensin qu'hubiere averamientos ente patronal y sindicatos pa tratar d'evitar que la protesta siga na ponte d'Añu Nuevu.