El Principáu va incentivar la instalación y treslláu de centros I+D+i a Asturies
![Innovación tecnológica en Asturias](https://www.rtpa.es/fotos//20/02/20200209191008_20200208tecnolot2.jpg)
La Conseyería de Ciencia va destinar dos millones d'euros a esta iniciativa
El Principáu va fomentar la instalación de centros d'I+D+i de multinacionales n'Asturies al traviés d'una nueva llinia d'ayudes que ta iguando.
Anguaño solo dos empreses tienen centru d'investigación, ArcelorMittal y Thyssen, anque hai más de 40 multinacionales n'Asturies.
Les ayudes van cuntar con un presupuestu de dos millones d'euros, y según la respuesta, va valorase la so medría. Búscase retornar, atraer y retener talentu.
Tamién la internacionalización, y amás, ye una manera de llegar al oxetivu d'invertir 2% del PIB n'investigación, desarrollu y innovación.
Al empar, la Conseyería ta en procesu d'ellaborar una regulación del sistema científico tecnolóxicu asturianu onde s'estableza qué ye un centru d'I+d+i priváu y va editar un rexistru.
L'oxetivu ye que les ayudes a les empreses que tean nesi rexistru, y que tengan el so centru de gastu d'innovación n'Asturies, seyan les que puean optar poles ayudes del Principáu.
Nestos momentos, tán redactándose les bases reguladores y espérase que les ayudes puean convocase n'abril.
L'alministración va facer un llabor d'acompañamientu a les empreses que les reciban de dos o tres años.