El comité d'Alcoa Avilés visita les plantes alemanes de Quantum

Pola asegura que'l Principáu nun cierra la puerta a nengún comprador

Yá tán n'Alemaña una representación del comité d'empresa d'Alcoa, pa conocer les fábriques de Quantum Capital, unu de los posibles inversores pa la planta d'Alcoa Avilés.

Los trabayadores fueron convidaos pol grupu industrial pa conocer de primer mano'l so trabayu y poder tener más datos pa valorar si Quantum sedría una bona opción de futuru pa la planta asturiana.

Quantun ye'l propietariu de l'antigua Tenneco y namás ta interesáu pola planta d'Avilés. La multinacional Alcoa yá s'asitió a favor de la otra ufierta, la del fondu suizu Partner.

El conseyeru d'Industria, Isaac Pola, asegura que'l gobiernu del Principáu nun cierra la puerta a nengún comprador d'Alcoa. Pola nun quixo confirmar si'l Fondu Suizu Partner ye'l que ta meyor asitiáu pa facese cola aluminera. El conseyeru tampoco adelanta'l plazu pero cree qu'esti mes sabráse'l futuru d'Alcoa.

Dende UXT aseguren que son munches les incertidumes, y les incógnites sobro lo que s'ufierta p'Alcoa. Nel sindicatu piden un proyectu seriu que garantice l'empléu y l'actividá nel futuru d'Alcoa.