El comité d'empresa de l'antigua Danone considera que los nuevos propietarios son la meyor opción

Los ex-trabayadores de la compañía tendrán preferencia nes contrataciones

El comité d’empresa de l’antigua fábrica de Danone en Salas afirma que tán contentos dempués de que se roblare ayeri l’alcuerdu de compra de la factoría pola compañía láctea holandesa Royal A-ware. Consideren que de les cuatro empreses que taben interesaes, esta yera la que presentaba un plan de viabilidá más solvente, seriu y a llargu plazu.

Anque nun se va subrogar a los 30 trabayadores que fueron indemnizaos, sí que tendrán preferencia a la hora d’entrar a trabayar, tanto los que tán desempleaos, como los que fueron pa otres empreses o los qu’optaron por treslladase a dalguna de les plantes que Danone tien n’España.

El restu de la plantiya que taba en Danone en Salas, 40 persones, yá fueron prexubilaes.